खोटाङमा बाँदर धपाउन पड्काएको भरुवा बन्दुकको गोलीले लागेर एकको मृत्यु भएको छ ।

बाँदर धपाउन दिक्तेल रुपाकोट मझुवागढी नगरपालिका-११ खार्मीका ५४ वर्षीय भलबहादुर तामाङले चलाएको बन्दुकको गोलीले लागेर सोही ठाउँका ५३ वर्षीय श्यामबहादुर तामाङको मृत्यु भएको हो।

बन्दुकको गोलीले लागेका तामाङको घटनास्थलमै मृत्यु भएको जिल्ला प्रहरी कार्यालय खोटाङले जनाएको छ।

भरुवा बन्दुकको गोलीले श्यामबहादुरको टाउकोमा लागेको थियो। भलबहादुरले बाँदर ठानेर बन्दुक चलाउँदा सँगै गएका तामाङलाई गोली लागेको पाइएको प्रहरीले जनाएको छ।

मृतक श्यामबहादुर भलबहादुरका आफ्नै काकाका छोरा हुन्। भलबहादुरलाई अस्थायी प्रहरी पोष्ट खार्मीबाट खटिएका प्रहरीको टोलीले भरुवा बन्दुक सहित नियन्त्रणमा लिएको छ ।

थप अनुसन्धान तथा कानुनी प्रकृयाका लागि जिल्ला प्रहरी कार्यालयबाट प्रहरी निरिक्षक निराजन बस्नेतको कमाण्डमा सोको सहितको ६ जनाको टोली घटनास्थल पुगेका छन्। घटनाको विस्तृत विवरण आउन बाँकी छ।